Despedimos este ano cineclubeiro cun evento moi especial, proxeción coa música en directo a cargo de Maefield.

O filme elexido é “La carretera fantasma” (“Körkarlen”), escrita, protagonizada e dirixida polo xenial Viktor Sjöström, e baseada na novela da súa compatriota e tamén xenial escritora Selma Lagerlöf, primeira muller en acadar o Premio Nobel de Literatura en 1909.

A historia acontece nunha Noitevella onde tres borrachos evocan unha lenda segundo a cal se un gran pecador é a derradeira persoa do ano en morrer, entón terá que conducir durante un ano enteiro A Carreta Pantasma, que recolle as ánimas dos mortos. David Holm, un dos tres bébedos, morre cando soa a última badalada da medianoite…

Velaquí a carteleira tan colorida que vos agarda estes derradeiros meses de 2024:

Tras Lazzaro Felice e Le Meraviglie, voltamos a unha máxica Italia da man de Alice Rohrwacher para acompañar a un pintoresco grupo de cazafortunas na súa busca de tesouros soterrados, ao tempo que o seu líder persegue desesperadamente a quimera dos seus soños.

A QUIMERA | venres 15 novembro, 20h30

E aliámonos de novo coa EOI de Vilagarcía para ofrecervos unha clase maxistral de idiomas en clave de cine. En novembro practicaremos portugués cunha cinta documental feminista, que, atención, non estará subtitulada! Preparade os oídos e escoitade ben. Pero non só iso, senón que a propia Marta Pessoa, a directora do filme, estará connosco para contarnos más do seu proceso e dialogar co público. Un intercambio de idiomas de 10.

UM NOME PARA O QUE SOU | xoves 21 novembro, 20h30

*gratuito para persoas socias e EOI

A gañadora d’Un Certain Regard en Cannes 2023, e a ópera prima de Molly Manning Walker, máis coñecida como directora de fotografía (título que quedará patente nesta longametraxe), nos leva de viaxe de amigas a Grecia, onde todo é beber, salir, repetir… Pero, no medio do éxtase xuvenil, as protagonistas terán que navigar as complexidades do sexo e do consentimento.

HOW TO HAVE SEX | mércores 27 novembro, 20h30

*acceso de balde – especial 25N

Pechamos a cartelería deste aPechamos a cartelería deste ano cunha xoia da animación actual, e a gran despedida de Hayao Miyazaki da ilustración. Este é o testamento do maestro para o seu neto, unha historia que o acompañe no seu crecemento e lle axude a encarar as dificultades da vida.

EL CHICO Y LA GARZA | venres 13 decembro, 19h00*

*o filme proxectarase en horario infantil e versión dobrada

Pero hai máis! Antes das festas de Nadal, despedímonos por todo o grande deste ano cunha festa audiovisual, un

ESPECTÁCULO FILME CONCERTO con DJ MAEFIELD | venres 27 decembro, 20h30

iremos revelando máis detalles próximos á data 😉

Chega setembro e toca retornar ás aulas onde aprender, expandir a curiosidade e socializar… as salas de cinema! Velaquí o currículo cinematográfico para este novo período:

Cun estilo documental que xoga entre os límites da ficción e da realidade, e notas de film noir que se achegan ao Vertigo de Hitchcock, traémosche un moderno drama romántico na China moderna. Un filme enormemente aclamado pola crítica e considerada a mellor obra do seu director Lou Ye, quen en todo momento xogará a sorprender ao espectador con xiros inesperados, alegorías, saltos de temporalidade e escenario, ou incluso confusión entre as personaxes que conforman este cadro inasible.

SUZHOU RIVER | mércores 11 setembro, 20h30

De relacións insospeitadas versa tamén o filme biográfico sobre o rockeiro Mauricio Aznar, recoñecido no festival de San Sebastián de 2023. O músico recorre Latinoamérica fuxindo da pantasma da adición, e polo camiño será acollido por outro músico co que desenvolverá unha tenra así como extravagante amizade. Rock e folclore unidos neste filme de Javier Macipe.

LA ESTRELLA AZUL | venres 27 setembro, 20h30

Outubro chega e nos atrapa na soidade e nos ritmos lentos. Se os protagonistas anteriores de antes se atopaban, agora despídense. Dende un minimalisto exquisito, observamos a separación de dúas amigas que xa non viven xuntas, unha mudanza que porá en vilo a súa amizade, unha partida que abre fendas se cadra insalvables.

A MOZA E A ARAÑA | mércores 9 de outubro, 20h30

E cunha estrea pechamos a programación desta etapa. Pero non unha estrea nova, senón unha que xa tivo lugar en 1977. En homenaxe á recén falecida diva da interpretación Gena Rowlands, proxectamos a película na que separar a actriz da personaxe resulta complexo por partida dobre, e a idade xa se presenta coma un monstro ao acecho das grandes artistas. Como de habitude, da man de John Cassavetes, vemos a unha Rowlands brillar e perderse na escuridade a un tempo.

NOITE DE ESTREA (OPENING NIGHT) | venres 18 de outubro, 20h30

Reserva xa as túas entradas e non perdas o comezo de curso no Salón García!

De novo en xuño enchémonos coas cores do Orgullo LGTBIQ+! E, para compensar tanta cor, traémosche outro filme en branco e negro, pero igual de brillante.

Tras a resaca das eleccións europeas, afastámonos do continente para achegarnos ao maestro do cinema xaponés, Kenji Mizoguchi, afamado pola súa poética visual e a súa crítica ao Xapón patriarcal. Nesta ocasión, Mizoguchi amósanos as consecuencias da guerra na poboación civil a través da historia de ambición e egoísmo de dous protagonistas masculinos: o un aspira a enriquecerse, o outro, a converterse en samurai. Serán, en cambio, as personaxes femininas as que máis han sofrir as consecuencias destas accións. Mizoguchi combina con enorme maestría a crudeza da violencia coa beleza máis pura nesta cinta de carácter fantástico, que se conta baixo a pálida lúa:

CONTOS DA LÚA PÁLIDA (1953)* | Mércores 19 de xuño, 20h30**

E agora si que entramos de cheo nas cores que máis caracterizan xa ao mes de xuño, unhas cores para encherse de orgullo e reivindicación. Retomamos, da man de Alejandro Marín, unha parte da historia da loita polos dereitos LGTBIQ+ no territorio nacional, contada a través do amor dunha nai polo seu fillo, posiblemente o único amor capaz de romper con todos os prexuízos, ao ritmo das Grecas:

TE ESTOY AMANDO LOCAMENTE (2023)* | Mércores 26 de xuño, 20h30**

entrada de balde!

**Recorda que agora as pelis comezan ás 20h30.

Pon as túas mellores cores e vén amar locamenti o cine coma nós.

Porque un só día para festexar as Nosas Letras non é suficiente, neste mes de maio traémosche 3 (si, 3) datas nas que achegarte ao cinema made in Galicia, ademais de estar moi ben acompañadas por algunha das responsables da película. Quen será, será?

O primeiro filme-coloquio do mes vén da man de Felipe Lage, produtor de Zeitun Films, con quen atravesaremos as montañas do Atlas marroquí, nun intento de dar reposo ao patriarca moribundo no lugar onde naceu. Con Lage conversaremos sobre este “western relixioso”, apelativo co que o seu irmán e director do filme, Oliver Laxe, se referiu a este traballo, anterior á súa obra quizais máis coñecida (Lo que arde) e tamén premiada en Cannes (Nespresso Grand Prize).

MIMOSAS (2016)* | Mércores 8 de maio, 20h30**

*Colección Filmoteca de Galicia: entrada especial de 2’50€ (socixs de balde)

E que mellor homenaxe á terra nai que cunha película que leva o seu nome, gravada ademais na Arousa e que visibiliza algunhas das problemáticas que máis afectan ao territorio, e particularmente ás mulleres, ao tempo que nos adentramos na vida de dúas delas, nai e filla, e a súa loita por manterse a flote. Quédate tralo filme de Álvaro Gago ao coloquio, que de seguro terás moito que dicir:

MATRIA (2023)* | XOVES 16 de maio, 20h30**

Acceso de balde ata completar aforo

Na última viaxe por este mes de filmografía galega, estaremos acompañadas de Leslie Howard, ao que talvez coñezas de películas como Foise co vento, e do director Marcos Nine, para profundizar na vida deste actor británico cuxos restos descansan en Cedeira, vítima dun ataque aéreo nazi. Era acaso espía durante a Segunda Guerra Mundial? Cal era o seu rol e que facía nas costas galegas? A todo isto tratará de responder Nine no seu fascinante documental que nos retrotrae a unha época de espías, espías dobles e aparenzas por onde se pasearán todas as grandes estrelas de Hollywood do momento:

A VIAXE DE LESLIE (2014)* | XOVES 23 de maio, 20h30**

Adéntrate con nós nesta viaxe triple polo cinema galego e festexemos ao grande este mes de Galicia!

**Atentas ao cambio de horario! Agora que a biblioteca mudou de espazo, o cine invade o edificio do Salón García media hora antes 😉