Autor: adega (Página 1 de 4)

Ciclo de Cine Galego | Programación MAIO ’24

Porque un só día para festexar as Nosas Letras non é suficiente, neste mes de maio traémosche 3 (si, 3) datas nas que achegarte ao cinema made in Galicia, ademais de estar moi ben acompañadas por algunha das responsables da película. Quen será, será?

O primeiro filme-coloquio do mes vén da man de Felipe Lage, produtor de Zeitun Films, con quen atravesaremos as montañas do Atlas marroquí, nun intento de dar reposo ao patriarca moribundo no lugar onde naceu. Con Lage conversaremos sobre este “western relixioso”, apelativo co que o seu irmán e director do filme, Oliver Laxe, se referiu a este traballo, anterior á súa obra quizais máis coñecida (Lo que arde) e tamén premiada en Cannes (Nespresso Grand Prize).

MIMOSAS (2016)* | Mércores 8 de maio, 20h30**

*Colección Filmoteca de Galicia: entrada especial de 2’50€ (socixs de balde)

E que mellor homenaxe á terra nai que cunha película que leva o seu nome, gravada ademais na Arousa e que visibiliza algunhas das problemáticas que máis afectan ao territorio, e particularmente ás mulleres, ao tempo que nos adentramos na vida de dúas delas, nai e filla, e a súa loita por manterse a flote. Quédate tralo filme de Álvaro Gago ao coloquio, que de seguro terás moito que dicir:

MATRIA (2023)* | XOVES 16 de maio, 20h30**

Acceso de balde ata completar aforo

Na última viaxe por este mes de filmografía galega, estaremos acompañadas de Leslie Howard, ao que talvez coñezas de películas como Foise co vento, e do director Marcos Nine, para profundizar na vida deste actor británico cuxos restos descansan en Cedeira, vítima dun ataque aéreo nazi. Era acaso espía durante a Segunda Guerra Mundial? Cal era o seu rol e que facía nas costas galegas? A todo isto tratará de responder Nine no seu fascinante documental que nos retrotrae a unha época de espías, espías dobles e aparenzas por onde se pasearán todas as grandes estrelas de Hollywood do momento:

A VIAXE DE LESLIE (2014)* | XOVES 23 de maio, 20h30**

Adéntrate con nós nesta viaxe triple polo cinema galego e festexemos ao grande este mes de Galicia!

**Atentas ao cambio de horario! Agora que a biblioteca mudou de espazo, o cine invade o edificio do Salón García media hora antes 😉

De abundancia vai o mes: programación ABRIL ’24

A abundancia da recén estreada primavera reflíctese na obra dos dous directores que eliximos para o mes de abril. Malia ás claras diferenzas, ambos son considerados intelectuais contemporáneos, altamente controvertidos e especialmente prolíficos na súa produción audiovisual (se falamos dos anos 60 a esta parte). Sabes de quen podemos estar a falar?

O primeiro é fácil. A un ritmo de case un filme por ano, e aínda en activo malia aos seus 88 anos, o inconfundible Woody Allen continúa cos seus enredos amorosos (ficticios e reais), comedias negras e tensións por resolver. Na súa última película sitúa a acción en París, nunha parella aparentemente ideal que verá a súa estabilidade ameazada. O crime e a sospeita farán a súa aparición neste filme que porén resulta lixeiro e entretido. Unha vez máis, o neoyorkino demostra que aínda lle quedan ideas dabondo nesa famosa caixa onde as colecciona. Unha sorte para o mundo do cinema.

GOLPE DE SORTE (2023) | Venres 12 de abril, 21h00

E pechamos o cunha nova aportación da Filmoteca de Galicia* para ofrecerche a opera prima da que sen dúbida é a figura cultural máis destacada da Italia do século XX: Pier Paolo Pasolini. Pensador e escritor de novela, ensaio, poesía, teatro… e tamén cinema, este intelectual enmarcou cos seus filmes o lado máis cru da sociedade italiana, dende unha visión especialmente crítica cos cambios sociais e culturais que observaba na súa patria. Con Accattone Pasolini estréase como director, centrando a cámara nas comunidades marxinais de Roma, focos de prostitución e crime, para contrastar a dureza das marxes co progreso económico que parecía experimentar o país. Este título marcaría o ton, temáticas e estilo que Pasolini habería de empregar nas súas sucesivas obras audiovisuais, que foron moitas para os escasos 15 anos que o autor se colocou detras da cámara, antes da súa prematura morte. Considerada pola crítica como unha das películas de maior crudeza argumentativa, Accattone é, con todo, unha cinta imprescindible na historia do cinema italiano e no patrimonio audiovisual universal.

ACCATTONE (1961) | Mércores 24 de abril, 21h00

*Colección Filmoteca de Galicia: entrada especial de 2’50€ (socixs de balde)

Vai reservando as túas entradas, que son abundantes, pero non tanto!

Poñémonos moradas de cine: especial mes da muller MARZO ’24

Volta o especial máis reivindicativo que estabas agardando. En honor ao 8M, Día da Muller, e como en anos precedentes, dedicamos este mes moi especialmente a elas: directoras, produtoras, realizadoras, guionistas, actrices e un largo etcétera, ás súas historias e andanzas polo cinematográfico.

O primeiro filme dará inicio aos actos da semana da muller do Concello de Vilagarcía. Tráemosche en colaboración coa Área de Igualdade do Concello (CIM) unha sátira delirante dun homicidio, cun sutil humor feminista de fondo, escuro e sanguento como soamente unha directora belga como Véronique Jadin sabería facer. Vén coñecer á empregada premium deste mes:

A EMPREGADA DO MES (2021) | MÉRCORES 6 de marzo, 21h00

*Entrada de balde ata completar aforo grazas a colaboración co CIM de Vilagarcía

E de homicidios continúa a cousa, porque como segundo filme este mes tráemosche nin máis nin menos que a cinta máis aclamada deste ano, a favorita para gañar o Oscar a mellor filme, e previamente gañadora da Palma de Oro en Cannes, probablemente a única película dun xuízo que SI é interesante! Unha anatomía coa que estarás en vilo ata o final intentando esclarecer que aconteceu: foi ela, non foi ela? Este non é un xuízo calquera, e o xuízo de toda a sociedade contra as mulleres, representadas na figura dunha muller, Sandra Hüller, que deberá xustificar ante todos as súas eleccións vitas, cada un dos seus pasos, e cada ínfimo matiz das súas palabras. Como nos amosa Justine Triet, todo poderá ser utilizado na súa contra:

ANATOMÍA DUNHA CAÍDA (2023) | VENRES 15 de marzo, 21h00

E de regalo unha terceira película para facer este mes especialísimo. Unha cinta doblemente reivindicativa: a biografía dunha poeta demasiado moderna para o seu tempo que loita por facerse un oco como artista, Fumiko Nakajo, filmada por unha directora que tamén loitou por abrirse camiño na xerárquica e masculina industria cinematográfica do Xapón de mediados do século XX, Kinuyo Tanaka. Non te chega de paralelismos? As dúas recibirían na súa busca artística o apoio de homes que actuaron como os seus mentores: Nakajo do tutor do seu clube de poesía, Tanaka dos directores cos que previamente traballara como actriz protagonista, principalmente Ozu; tamén as dúas acabarían consumidas polo cancro. Unha xoia clásica de indubidable delicadeza que rescatamos con moito agarimo este mes:

PEITOS ETERNOS (1955) | VENRES 22 de marzo, 21h00

Programación Filmoteca

Non sei ti pero nós acabamos moradas!

Estamos de volta, familia! Programación XANEIRO/FEBREIRO 2024

Despois destas datas tan sinaladas, e tras o especial de decembro, este 2024 voltamos á normalidade da nosa programación bimensual!


Por se non tivestes suficiente atracón de familia, ou se xa a estades a botar de menos, non comecedes co detox aínda, porque este XANEIRO promete ser máis familiar que nunca:

Xusto cando crías que tiñas a vida resolta —tranquilidade no traballo, os fillos colocados, a túa nai xa maior atendida…— vai o teu marido e marcha con outra. Isto é ao que se enfronta o personaxe protagonista da película coa que te propomos comezar o 2024. Abrumadora, emotiva e delicada son algúns dos termos cos que se adoita describir este filme de gran profundidade emocional, sen por iso perder a súa lixereza e encanto, co que nos adentramos nunha crise existencial en torno á familia da man da enormísima Isabelle Huppert, co sutil romanticismo ao que Mia Hansen-Løve nos ten habituadas en guion e cámara.
Quen sabe o que nos agarda o porvir este 2024? Por se acaso, esta profunda reflexión en torno ás relacións pode axudarnos a estar preparadas.

O PORVIR (2016). Proxección: MÉRCORES 10 de xaneiro, 21h00

E continuamos cunha familia moito máis real e próxima: a familia Campos. Se vos digo Chichi, vós dicides… Así é, o pioneiro da banda deseñada en galego, humorista gráfico, guionista… faleceu na década dos 90 antes de cumpriren os 40 anos. Da man do seu fillo Nico Campos, achegámonos a esta figura irreverente do panorama galego antifranquista, nun documental que busca rescatar a memoria do seu pai e rendirlle homenaxe, ao tempo que trata de dar resposta a moitas das cuestións que quedaron sen responder tras a súa prematura morte, dende a perspectiva dun fillo que tiña tan só 11 anos cando isto aconteceu.
Por certo, que Nico Campos estará ese día con nós para presentarnos ao seu pai e abrir un diálogo co público!

CHICHI E MAIS EU (2023). Proxección + Coloquio con Nico Campos: VENRES 26 de xaneiro, 21h00


Tras abrir estas cuestións familiares, en FEBREIRO toca recollemento, un tempo para o íntimo e privado…

Precisamente no papel de detective privado, Gene Hackman desvela os segredos ocultos dun matrimonio en principio anodino, ata que, pouco a pouco, vaise dando de conta que a infidelidade non é o único misterio que esconde esta parella… Pese á súa Palma de Ouro a mellor película en Cannes (1974), e á aclamación unánime da crítica, esta é a película máis esquecida de Francis Ford Coppola, quizais porque a realizou entre o Padrino I e II. Un brillante thriller que consigue manter a tensión en todo momento, grandes actuacións e un guion asinado polo propio Coppola no que, xa nos 70, se cuestiona sobre a relación entre intimidade e intrusión tecnolóxica. Un adiantado!

A CONVERSA (1974). Proxección: VENRES 23 de febreiro, 21h00

**Se queredes saber máis sobre o cinema dos 70, non vos perdades o episodio do noso podcast O Gafapasta Plasta: especial anos 70.**

Se temos un plan preferido para o frío inverno, sen dúbida ese é ir ao cine, como lles acontece os protagonistas da última película que proxectaremos este febreiro. Ansa e Holappa se atopan por azar nunha fría cidade finlandesa. Cada un ve na outra persoa unha esperanza: o desexo de superar os seus problemas persoais, a posibilidade de atopar sentido na vida xunto a alguén. Pero o caprichoso azar que os xuntou parece obrar na súa contra.
Coa habitual tenrura de Kaurismäki, o director finés nos presenta na súa última película, Premio do Xurado en Cannes (2023), un sinxelo mais emotivo romance intimista, unha traxicomedia que fala non só de amor, senón tamén do illamento social, da adicción e das pobres condicións laborais, da loita pola supervivencia nun mundo cada vez máis hostil e menos humano. Pero, tamén típico de Kaurismäki, sempre queda espazo para a esperanza.

FALLEN LEAVES (2023). Proxección: MÉRCORES 28 de febreiro, 21h00

Reserva xa as túas entradas para este 2024!

ESPECIAL “Muller no audiovisual” este decembro 2023

Este decembro, como cada ano, celébrase en Vilagarcía a semana de MULLER E CULTURA, organizado pola Área de Igualdade (CIM) do Concello. Nesta ocasión, o evento centrarase no ámbito audiovisual, a nosa especialidade!!! É por este motivo que nos aliamos co CIM para ofrecervos unha programación moi moi especial.

Tan especial, como que a nosa primeira convidada será, nada máis e nada menos, que a gañadora deste ano da cuncha de ouro no Festival de San Sebastián e a primeira directora española en acadalo: Jaione Camborda. Case nada! Como xa todas sabedes de seguro, Jaione gañou coa súa segunda longametraxe, O Corno, gravada entre A Illa e Vilanova, e, por suposto, en galego, porque esta donostiarra xa é galega de corazón. Nós non imos traer O Corno (ooooh), pero si a Jaione (beeeeen), porque se hai unha muller que aparece como sinónimo de audiovisual e galego agora mesmo, é ela. E crédenos que ten moito que contarnos.

Pero non nos imos limitar a falar con ela. O coloquio será precedido polo visionado da súa primeira longametraxe: Arima. Tanto para as que vistes O Corno como para as que non, Arima é imprescindible para entender a traxectoria desta cineasta, e permitiranos crear un marco dende o que analizar o audiovisual galego, o espazo da muller, as temáticas e medios, os referentes… e moito máis. Así que prepadas porque:

VENRES 15 DE DECEMBRO: COLOQUIO CON JAIONE CAMBORDA + PROXECCIÓN DE ARIMA (2019)

Unha vez repostas desta xornada, seguimos! Porque o especial “Muller e audiovisual” ten que incluír a máis de unha muller, certo?

E no audiovisual, aínda que ás veces o esquezamos, non hai só directoras, e non soamente as longametraxes son cine. Por iso, para a segunda xornada, quixemos crear un espazo no que escoitar as voces máis esquecidas da industria: mulleres que comezan no audiovisual, mulleres que traballan nos vericuetos, entre fotograma e fotograma e frase e frase, facendo que todo cobre sentido. Por iso:

SÁBADO 16 DE DECEMBRO: CONVERSA CON LAURA E CORAL PIÑEIRO, MÓNICA ALONSO E VERÓNICA CALLÓN + PROXECCIÓN DE CURTAS FEITAS POR CINEASTAS GALEGAS

Queriamos que as curtas foran unha sorpresa… pero, precisamente porque estamos a falar das mulleres no audiovisual, lles debemos a estas creadoras o recoñecemento que se merecen polo seu traballo, así que velaquí está a selección de curtas da que poderedes gozar o sábado no Salón García:

  • Aurelia (2011) Milena Martínez
  • Na pel da memoria (2022) Laura e Coral Piñeiro
  • Ruovesi (2023) Andrea Zapata-Girau
  • 30’ 70 60 120’ (2021) Marta Valverde
  • O neno sardiña (2022) Lucia Estevez
  • Crónica dun recordo (2022) Zahira Teijelo

Recordámosvos que como este ESPECIAL está patrocinado polo CIM Vilagarcía, todas as actividades serán DE BALDE, así que apuntádevos xa!! E vide gozar do cine, como sempre, na mellor compañía 😉

Continúa o #outonodecine: programación NOVEMBRO ‘23

Despois da tregua que nos deu o sol, agora si podemos dicir que comeza a época de “peli e manta”, e que mellor lugar para disfrutar do cine que no Salón García?

Este mes de novembro agárdanvos dúas cintas moi especiais, dous dramas adolescentes contemporáneos moi luminosos que tratan con grande sensibilidade e tenrura algunhas das problemáticas máis comúns deste grupo de idade, no que a identidade está en proceso de formación e no que todas as vivencias deixarán unha clara impronta nas posibilidades e proxectos futuros.

Coa súa segunda longametraxe, o novísimo Lukas Dhont conságrase como un excepcional cineasta (a un tempo director e guionista) interesado na formación da sexualidade e no xuízo social que rodea a esta cuestión e que impide a liberdade plena dos seus protagonistas. Nesta ocasión, a través da idílica amizade de Léo e Rémi, chea de tenrura e inocencia, se cuestiona onde está a liña entre amor e amizade cando se trata de dous varóns, e como unha relación infantil pode cambiar de connotación na adolescencia:

CLOSE (2022). Proxección: MÉRCORES 8 de novembro, 21h00

E de segundas longametraxes vai a cousa, pois Pilar Palomero repite o éxito acadado coa súa primeira cinta tamén como directora e guionista, e nos presenta no seu segundo filme a unhas niñas que se van ver forzadas a deixar de selo. Arrincadas da adolescencia, pero sen se poder considerar aínda adultas, estas xóvenes embarazadas terán que crear un espazo propio entre estas dúas realidades, apoiándose as unhas ás outras. Esta é a cinta elixida en colaboración coa Área de Igualdade do Concello de Vilagarcía con mor do 24N, o día en contra da violencia contra a muller. A entrada será de balde ata completar aforo.

LA MATERNAL (2022). Proxección: VENRES 24 de novembro, 21h00 *de balde*

Reserva XA as túas entradas e non te quedes sen sitio este #outonodecine

Página 1 de 4

© 2024 Cine Clube Ádega & Web desarrollada por Prixma. &Aviso Legal - Política de Privacidad - Política de Cookies

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies