Autor: adega (Página 2 de 4)

Lanzamos o concurso #EuFagoCine

A promoción do cinema e do audiovisual na comarca é a razón de ser do Cine Clube Ádega. Este ano, por vez primeira, a Semana de Cine focalízase nun grupo específico da sociedade a miúdo infrarrepresentado na programación cultural: a mocidade.

No Cine Clube Ádega recoñecemos o valor creativo da xuventude, a súa capacidade de innovar e contar historias. Lonxe de rexeitar as novas tecnoloxías como unha lacra para o audiovisual, celebramos a súa capacidade de por á mocidade no centro do proceso creativo e, por tanto, de democratizar a cultura. Por iso organizamos este concurso no que convidamos á mocidade a compartir os seus vídeos propios nas redes sociais.

Se queres participar, segue lendo:

Que temática deben ter os vídeos?

Animamos a cada participante a elixir a súa escena favorita do cine (dende película, serie, webserie, real ou de animación…) e facer un vídeo referente á mesma, xa sexa reproducir a escena, homenaxeala, explicar a súa relevancia… Non hai un formato específico nin limitacións á creatividade.

Como participar no concurso?

Cada participante debe subir o seu vídeo en formato reel á súa conta instagram ou tiktok e mencionar na descripción ao Cine Clube Ádega @cineclubeadega así como o hashtag #EuFagoCine

Non hai límites ao número de vídeos que cada participante pode subir.
Iso si, os vídeos deben ter unha duración máxima de 30 segundos.
A lingua de preferencia será o galego, pero admitiranse vídeos en calquera outra lingua.

!!! Non se terán en conta vídeos enviados por mensaxe privada nin por stories.

Quen se pode presentar?

Todas as persoas interesadas, residentes en calquera das 4 provincias galegas, que teñan como máximo 30 anos (inclusive)*, e que poidan recoller o premio en persoa o 4 de agosto (o, no seu defecto, algún representante debidamente acreditado).

*En caso de resultar premiada, será necesario a presentación do DNI para confirmar que se cumpren os requisitos.

Cales son os prazos de presentación?

Admitiranse todos os vídeos presentados dende hoxe ata o 3 de agosto.

Comunicación de persoas premiadas: xoves 3 de agosto (por privado)

Entrega de premios: venres 4 de agosto, para pechar a Semana de Cine 2023.

Cales son os premios?

Premiaranse os 3 mellores vídeos, grazas á colaboración con Zona Aberta:

Un primeiro premio dun anel de luz selfie de 12″ con dous trípodes e mando bluetooth.

Un segundo premio dun abono por valor de 50€ para gastar en comercios de Zona Aberta.

Un terceiro premio dun abono por valor de 30€ para gastar en comercios de Zona Aberta.

Os 3 mellores vídeos recibirán tamén un abono anual gratuíto do Cine Clube Ádega.

Ademais, unha selección dos mellores vídeos será reproducida ao longo da Semana de Cine 2023.

Para calquera dúbida, escríbenos a comunicación@cineclubeadega.com  

Moita sorte ás participantes e que o cine vos acompañe!!

Bonus Track: o filme de XULLO ’23

Crías que entre tanto especial de xuño e coa Semana de Cine ás portas non quedaba espazo para máis programación en xullo??? Por sorte para ti, o cine nunca descansa, e nós tampouco: para xullo traémosche un único filme a modo de bonus track, para que a espera ata a Semana de Cine non se che faga longa.

Malia que a discusión en torno ao consentimento teña sido trending topic os últimos meses no noso país, en Francia xa se viña falando desta cuestión fai tempo, cristalizada nunha cinta de Yvan Attal na que asistimos a un xuízo entre vítima e acusado. Existe máis de unha versión da realidade cando se trata dunha agresión? Cales son os mecanismos polos que se cuestiona a versión da vítima? Por se dubidas aínda de como vai isto do consentimento e dos xuízos sociais que rodean esta cuestión, non te perdas esta reflexión cinematográfica:

O ACUSADO (LES CHOSES HUMAINES) (2021). Proxección: mércores 12 de xullo, 21h00

 

Un mes cheo de cores: programación XUÑO ’23

Seguro que estás dacordo en que xuño é un mes moi especial: son os días máis longos e luminosos, o verán comeza a intuirse, péchanse ciclos e comezan outros con proxectos de vacacións, festas varias, días de praia… todo é especial en xuño. E no Cine Clube non podía ser menos. Por iso, este xuño de 2023 vén cargadiño de ESPECIAIS DE CINE:

Comezamos esta semana mesma co ESPECIAL DE MEDIO AMBIENTE cunha cinta para concierciarnos sobre a contaminación da industria e o impacto que ten no medio e na nosa saúde, porque nós tamén formamos parte do medio, aínda que ás veces o esquezamos. Pero aquí vén Mark Ruffalo para recordárnolo fronte aos tribunais, nun thriller xudicial contemporáneo à la Erin Brockovich, tamén baseado en feitos que aconteceron (e o continúan a facer). Unha peli de Todd Haynes que gañou recoñecemento internacional coa súa nominación aos premios César a mellor película de 2020. Moi recomendable se queres aprender as claves para loitar contra a macroindustria:

DARK WATERS (2019). Proxección: mércores 7 de xuño, 21h00 

A programación continúa cunha nota de comedia para subir os ánimos. Festexamos o ESPECIAL DÍA DA MÚSICA na gran pantalla co mellor grupo glam rock da historia: Spinal Tap!! Que quen son? No seu documental, convertido en filme de culto, seguimos á banda nunha xira onde aprenderás todo o que precisas saber deles, da súa música, e do ascenso á fama. Claro que a cinta podería estar a falar de calquera grupo rock/heavy metal dos 80. É isto precisamente o que pretenden o seu director, Rob Reiner, e os seus colegas de guion e reparto, quen conforman esta banda a partir dos topicazos do momento e documentar así, en clave de humor, a época máis dura da música. Bailarás da risa, prometido.

THIS IS SPINAL TAP (1984). Proxección: mércores 21 de xuño, 21h00 

E, como cada ano, pechamos este mes de cine sumándonos ás reivindicacións para a defensa e celebración da diversidade cun ESPECIAL ORGULLO LGTBIQA+, que este ano é especialmente especial grazas á Área de Igualdade (CIM) do Concello de Vilagarcía, que promociona unha semana de cine LGTBIQA+! En total serán tres películas diferentes que visibilizan identidades disidentes da heteronorma en épocas tamén diversas:

LOVE IS STRANGE (2014). Proxección: mércores 28 de xuño, 21h00

PARIS IS BURNING (1990). Proxección: xoves 29 de xuño, 21h00

20000 ESPECIES DE ABEJAS (2023). Proxección: venres 30 de xuño, 19h30 e 22h00** 

*Todas as películas do ciclo LGTBIQA+ serán de balde para todo o público.

**20000 especies de abejas terá dous pases: o primeiro ás 19h30 e o segundo ás 22h.

De leste a oeste por Europa: programación MAIO ’23

Este mes de maio focalizamos a mirada cinematográfica en Europa, con tres filmes moi distintos entre sí, cada un unha xoia de pleno dereito, se cadra esquecida ou pouco (re)coñecida, motivo polo que lles dedicamos un merecido espazo na gran pantalla. De obrigado cumprimento neste mes das Letras Galegas é a promoción do cinema galego, polo que traemos desta vez unha cinta contemporánea potencialmente aditiva. Intrigada? Pois apunta:

De Suecia rescatamos un clásico moderno, a gañadora ao Globo de Ouro a mellor filme extranxeiro de 1987, un relato agridoce no que o universo infantil do seu protagonista, un neno de 12 anos, vese arrebatado pola enfermidade materna e, como un can, sen voz nin voto, é enviado a unha nova vida no campo. Tamén nomeada a mellor dirección e guión adaptado nos Oscars dese mesmo ano, este filme consolidou a Lasse Hallström na escena internacional como director e guionista, con ese estilo propio co que logra capturar a duzura e a esperanza incluso nos momentos máis crus.

A MIÑA VIDA COMO UN PERRO (1985). Proxección: mércores 3 de maio, 21h00 

E do leste de Europa, retornamos ao noso oeste para festexar o día das Nosas Letras cun filme contemporáneo sobre a Galiza do século XX que abre as portas a unha historia curiosa, sorprendente e descoñecida que tivo, en cambio, un gran impacto na nosa cultura e economía: falamos do cláviceps purpúrea, un fungo alucinóxeno que agroma nos cereais, e que atopou na Galiza un dos lugares de maior produción mundial. Queres saber máis? Pregúntalle a Sabela Iglesas e Adriana P. Villanueva, as súas directoras, que nos acompañarán durante o visionado do seu documental para dialogar co público e aclarar todas as curiosidades sobre este fungo tan descoñecido e tan presente.

NEGRO PÚRPURA (2021). Proxección: mércores 10 de maio*, 21h00. Entrada DE BALDE

*Por mor das eleccións municipais, a proxección Especial Letras Galegas será antes da data oficial do 17 de maio

A última parada por Europa nos leva de novo cara ao leste do continente, da man dun dos máis aclamados directores contemporáneos que este nos ofrece, o internacionalmente afamado e icónico Béla Tarr. Rescatamos do realizador húngaro unha das súas últimas longametraxes, estreada en 2000 aínda que co seu característico branco e negro, un filme de planos longos e temática sombría que segue a tradición da anterior Sátántangó e que, con varias horas menos de metraxe, é considerada a nivel similar de beleza, orixinalidade e vehemencia. Un filme no que argumento e estética van á par e suscitan unha profunda reflexión sobre o comportamento das masas e o poder da demagoxia.

HARMONÍAS DE WERCKMEISTER (2000). Proxección: mércores 31 de maio, 21h00 

Recorda como sempre que podes reservar a túa praza, votar na canle de Telegram, ou facernos chegar as túas suxerencias e comentarios por calquera das vías de comunicación das que dispomos. Elixe a túa e contacta! Queremos saber a túa opinión 🙂

Nova estación, nova cartelera: programación ABRIL ’23

Comezamos a primavera estreando cartelera e nos sumamos ás cores máis alegres desta época. Desfrutade do sol, porque os thrillers que traemos este mes de abril vanvos por os pelos de punta:

Tildada como a “resposta australiana á alienación xuvenil dos 60”, e con reminiscencias ao Paraíso perdido de Milton, seguimos a un novo profesor no seu descenso ao inferno australiano. Alcohol, drogas e malas compañas é a fórmula perfecta para levarse un bo susto. E se ademais estás no medio do deserto, onde vas fuxir? Non hai escapatoria posible a este pesadelo grotesco no que te afundes máis e máis. Hoxe obra de culto, rexeitada e admirada polos australianos a partes iguais polo retrato tan pouco favorecedor do seu país, é un dos filmes que levou o cinema australiano ao panorama internacional (seleccionada para Cannes nese ano); curiosamente, o seu director Ted Kotcheff é canadense.

WAKE IN FRIGHT (1971). Proxección: mércores 12 de abril, 21h00 

E seguimos de paseo polos infernos: desta vez, o inferno interior de quen é tildado como “monstro” pola sociedade, e trata de reprimir os seus desexos máis profundos. Unha cinta polémica e provocadora que nos obriga a mirar nos claroscuros da alma para encontrar os monstros que levamos dentro. O mundo virtual se presenta aquí como unha escapatoria á realidade, unha sorte de gorida onde sentirnos libres do xuízo social. Pero, pode a tecnoloxía liberarnos? É a sociedade demasiado rápida en condenar? Deberiamos aceptar máis graos de “monstrosidade”? Todo esto é o que te atoparás nesta película de Carlos Vermut.

MANTÍCORA (2022). Proxección: mércores 26 de abril, 21h00 

Recorda como sempre que podes reservar a túa praza, votar na canle de Telegram, ou facernos chegar as túas suxerencias e comentarios por calquera das vías de comunicación das que dispomos. Elixe a túa e contacta! Queremos saber a túa opinión 🙂

Mes da muller no Cine Clube: Programación MARZO ’23

Liches ben: mes, non día, porque no Cine Clube Ádega queremos dedicarlle todo este mes de marzo ás mulleres no cine. Como en tantos outros ámbitos, as directoras, guionistas, actrices… tradicionalmente teñen sido esquecidas ou invisibilizadas. Por iso, neste MES DA MULLER, propómoste dúas citas moi especiais, cunha sorpresa final, para sacar do esquecemento e reivindicar as aportacións que as mulleres fan, e fixeron, ao audivisual internacional. Segue lendo:

Conseguir facer a túa primeira longametraxe non é doado para ninguén, especialmente se a directora é unha muller, moi especialmente se a película trata unha temática en principio “feminina”. Por sorte, nos últimos anos o número de mulleres que se adican ao cine está en aumento, e con elas chegan novas temáticas e formas distintivas de tratalas. Nós quixemos amosar o traballo máis recente do panorama nacional, cun filme que recentemente gañou o Goya a mellor dirección novel para Alauda Ruiz de Azúa e a mellor actriz protagonista para Laia Costa, ademais de varios premios Feroz, Forqué, no Festival de Málaga, e o Gaudí a mellor película europea… un filme que leva meses dando que falar polo seu retrato dunha recente nai superada pola maternidade e que pide auxilio:

CINCO LOBITOS (2022). Proxección: VENRES* 10 de marzo, 21h00 | entrada libre

*este filme proxectarase en VENRES para que o mércores 8 vos poidades unir á manifestación

A seguinte será unha cita co lado máis rebelde da Europa do leste: unha sátira surrealista protagonizada por dúas mulleres que deciden romper con toda norma e xogar coa realidade sen preocuparse das consecuencias. Esta cinta subversiva e experimental dos anos 60 da checoslovaca Vera Chytilová (guion e dirección) foi recoñecida como a mellor película do país en 1966 e considerada unha das mellores aportacións da New Wave checa. Na actualidade, segue sendo citada como a mellor película checa. Porén, a súa distribución foi rapidamente prohibida polo réxime comunista debido ao seu carácter crítico e durante décadas pasou desapecibida. Este mes a poñemos en valor como se merece! Coa súa mistura de cores e caótica estructura, Chytilová rompe coa visión patriarcal dun único tipo de muller esencializada e desposuída de personalidade, que aínda se intenta aplicar hoxe en día:

SEDMIKRASKY (1966). Proxección: MÉRCORES 22 de marzo, 21h00

E falando de experimental e muller, non podiamos deixar pasar a oportunidade de proxectar esta xoia de 14 minutos de Maya Deren (dirección, guion, actuación) que xa en 1943 erixiuse como un dos filmes experimentais máis importantes do cine e converteu á súa directora, unha muller, nunha icona de referencia no panorama estadounidense dos 40 e 50:

MESHES OF THE AFTERNOON (1943). Proxección: MÉRCORES 22 de marzo, tras SEDMIKRASKY

Esta cinta muda estará acompañada por música en directo da man de 3 excelentes artistas do panorama local: Iria Caamaño ao piano, Andrea Petisco ao violonchelo e Jorge Ortal ao violín.

Unha cita única e un final máxico para reivindicar este mes da muller na industria cinematográfica!!

Página 2 de 4

© 2024 Cine Clube Ádega & Web desarrollada por Prixma. &Aviso Legal - Política de Privacidad - Política de Cookies

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies